Pamuka laong
Alhamdulillahi Rabbil Alamin wassalato wassalamo Ala Asharafil-anbiyaa'e walmursaleen Sayidina Muhammad waala Alihi wasahibihi ajmaeyn….amma ba'd:
Hadith pagpulakkanat sin Ummat
Pagbalik-balikan makamataud in Hadith Mashor ha dila sin kaulamaan ha tungod sin katumpuk tumpkan sin Islam,sambil paghinangun na sin kaibanan sabab hikapangufor.
In hadith ini kiyariwayat siya sin mga Ashabaossunan ha sanad tumotub kan Abu Hurayra atawa kan Abdullah ibno Amr atawa kan Anas bin Malik atawa kan Abdullah ibno Omar atawa kan Muawiya bin Abi Sufyan iban na sin dugaing dain kanila-Radiyallaho Anhom-ha lapal dugaing-dugaing,biya'na sin:
Sabda sin Rasul SAW:
(افترقت اليهود على احدى وسبعين فرقة وتفرقت النصارى على اثنتين وسبعين فرقة وتفترق أمتي على ثلاث وسبعين فرقة)
Napulakkanat in Yahudi kapituan tag-isa tumpukan,iban napulakkanat in Nasrani pa kapituan tagduwa tumpukan,iban mapulakkanat in Ummat ko pa kapituan tag-tuw tumpukan.
(و في بعض الروايات:كلها في النارالا واحدة وهي الجماعة)
Ha dugaing bayta: in katan yadto ha api Narka Jahannam malaingkan amura in hambuuk amuna in Jamaa.
(وفي رواية:ثنتان وسبعون في النار ووحدة في الجنة وهي الجماعة)
Ha dugaing Riwayat: kapituan tagduwa tumpukan ha lawm Narka iban in hambuuk tumpukan ha lawm Surga amuna in Jamaa.
(وفي رواية ان الصحابة تساءلوا:من هي يا رسولالله؟فقال ما انا عليه وأصحابي)
Ha dugaing bayta in mga Sahabat nag-asubo iyasubuhi: Hinda siyo yadto Ya Rasulullah? Sabda sin Rasul SAW: uno-uno na in kiyaawnan ko iban mga Sahabat ko.
Nag Ijtihad in mga Ulama ha pag itong sin tumpukan ini sarta piyasampay sin tiyap-tiyap Alim imitong ha Jaman niya pa itongan 73 tumpukan. Hinang nila in katan tiranan hipag iitong hasupaya maparihala nila in itongan amoin nasabbot ha Hadith, Hi Imam Abdulqahir Albagdady (naw.429h) ha kitab niya (Al-Farqo baynal Firaq)hinang in mga Khawarij 20 tumpukan. Hi Imam Ibno Al-jawzi (naw.597h)ha kitab niya (Talbis Iblis) hinang in Khawarij 12 tumpukan.
Salassayan ha Hadith
1.kalawngan sin pag itong:
In mga Ulama amoin nagparihala ha pag itong sin mga tumpukan ini iban nagpatarrang sin taud nila piyatub-tub nila hadja ha Jaman nila,kiyalupahan nila na sin in Tahun magsusung sarta in tumpukan magtataud,iban in Ijtihad dih mahugna.
Uno na baha in mabissara nila pag puas sin hang-ibo tahun dain ha pag itong nila!!!
Uno nabaha in mabissara nila ha puas sin duang ibo pa tung-ibo Tahon?!!!!
Tanto tuud in taud duun ha ini bukon amon maksod niya in hipaitong,in hantang bihaini mataud kabakan mo ha lawm sin Qur'an iban na sin mga kissa niya,biya'na sin Farman sin Allah:
(وَلَوْ أَنَّمَا فِي الْأَرْضِ مِنْ شَجَرَةٍ أَقْلَامٌ وَالْبَحْرُ يَمُدُّهُ مِنْ بَعْدِهِ سَبْعَةُ أَبْحُرٍ مَا نَفِدَتْ كَلِمَاتُ اللَّهِ إِنَّ اللَّهَ عَزِيزٌ حَكِيمٌ)
Iban misan pa awn ha Ginlupaan dain ha kahoy bulpen sarta in Dagat lipaton makapito dih da maubos hisulat in Kalima sin Allah,tanto tuud in Allah saingat ingat maghukom.
In dagat sibu da timaod siya pa pito atawa pa kapituwan atawa pa pitonggatos dih da maubos in kalmia sin Allah.
(اسْتَغْفِرْ لَهُمْ أَوْ لَا تَسْتَغْفِرْ لَهُمْ إِنْ تَسْتَغْفِرْ لَهُمْ سَبْعِينَ مَرَّةً فَلَنْ يَغْفِرَ اللَّهُ لَهُمْ ذَلِكَ بِأَنَّهُمْ كَفَرُوا بِاللَّهِ وَرَسُولِهِ وَاللَّهُ لَا يَهْدِي الْقَوْمَ الْفَاسِقِينَ)
Pangayuan mo sila kaampunan atawa dih mo sila pangayuan kaampuanan,misan mo sila pangayuan kaampunan makakapituan dih da sin sila ampunon sin Allah,karna tanto tuud in sila nagkufur sila pa Allah iban pa Rasul niya iban in Allah dih niya panduan in kawman sin mga Fasiq.
In pag Istighfar misan pa siya pa siya makakapituan pagbalik-balikan atawa mabah atawa lumabi dihda mapinda in hukuman sin Allah pa mga Munafiq.
Ha duun ha ini,in manggayonggong ha taud 73 tumpukan dain ha kahawpo pamaham sin Hadith.
***
2.Kamaksuran sin Ummat:
In pagtafsir ha Ummat amoin nassabot(Ummat ko) bat amona in Ummat Islam bukon tartanto gawgot,sabab in Ummat sin Rasul SAW amona in Ummat Da'wa ha maqam panagnaan bukon ha kamaksuran in Ummat Ijaba malaingakan subay siya awn daleel.
Kiyalukis sin Qur'an sin in tiyap-tiyap kanabihan piyara ha Qawman niya sarta diya niya nagbissara piyasukapat niya ha ginhawa niya.tiyawag hi Nabi Salih iban hi Nabi Hud in kawman niya in panawag tawag bihaini(Ya Qawm: O kaw kawman)farman sin Allah:
(وَإِلَى عَادٍ أَخَاهُمْ هُودًا قَالَ يَا قَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ أَفَلَا تَتَّقُونَ)
Iban ha Qawman hi Ad taymanghod nila hi Hod agi niya:o kamo mga qawman ko pag tag-ipon kamo pa Allah karna wayruun tuhan niyo mapuas dain kaniya,uno dih ka kamo magmabuga?
Farman sin Allah
(وَإِلَى ثَمُودَ أَخَاهُمْ صَالِحًا قَالَ يَا قَوْمِ اعْبُدُوا اللَّهَ مَا لَكُمْ مِنْ إِلَهٍ غَيْرُهُ قَدْ جَاءَتْكُمْ بَيِّنَةٌ مِنْ رَبِّكُمْ)
Ha Qawman hi Samod taymanghod nila hi Salih,agi niya:O kamo mga kawman ko pag tag-ipon kamo pa Allah karna wayruun tuhan niyo dugaing dain kaniya,tantoi tuud kiyaratungan na kamo katarrangan dain ha tuhan niyo.
Damikkiyan hi Nabi Musa biya'da isab haini in panawagtawag niya pa Kawman niya damikkiyan hi Nabi Nuh,Farman sin Allah:
(وَإِذْ قَالَ مُوسَى لِقَوْمِهِ يَا قَوْمِ لِمَ تُؤْذُونَنِي وَقَدْ تَعْلَمُونَ أَنِّي رَسُولُ اللَّهِ إِلَيْكُمْ)
Ha wakto namong hi Musa ha Kawman niya O kamo kawman ko mayta niyo ako mulahon sin kiyaingatan niyo in ako daak sin Allah kaniyo.
Farman sin Allah
(إِنَّا أَرْسَلْنَا نُوحًا إِلَى قَوْمِهِ أَنْ أَنْذِرْ قَوْمَكَ مِنْ قَبْلِ أَنْ يَأْتِيَهُمْ عَذَابٌ أَلِيمٌ (1) قَالَ يَا قَوْمِ إِنِّي لَكُمْ نَذِيرٌ مُبِينٌ)
Tanto tuud piyara namu hi Nuh pa Kawman niya(hangkan namu kaw Nuh piyara pa kawman mo)hasupaya mapaanib mo in kawman mo dain ha kabinsanaan ha dih pa sila dagpakan sin kabinsanaan mapangsan.agi niya ha kawman niya tanto tuud in ako mari kaniyo magpatumtum matampal.
In (Qawm) nasabbot duun ha ini tanto tuud waypagduwa ruwa amuna in Ummat Da'wa,amoin diyatungan sin kanabihan sarta piyasampayan sin panawag tawag sin Allah,awn na dain kanila namaratsaya damikkiyan awn da isab nanulangi.
(ثمَّ أَرْسَلْنَا رُسُلَنَا تَتْرَى كُلَّ مَا جَاءَ أُمَّةً رَسُولُهَا كَذَّبُوهُ فَأَتْبَعْنَا بَعْضَهُمْ بَعْضًا وَجَعَلْنَاهُمْ أَحَادِيثَ فَبُعْدًا لِقَوْمٍ لَا يُؤْمِنُونَ)
(إِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَاعْبُدُونِ)
In ayat ini tugila tuud ha pag usal sin Ummat sin Rasul ha ma'na Ummat Da'wa,dain ha sabab yan, in pagsulay pag itong sin taud sin Firaq ha likusan sin Muslim bukon gawgot,bang nato tiyapsiran in Ummat ha Hadith pa Ummut Da'wa nakahali-hali na kitaniyo, in katan Muslim Ummat hambuuk da umatubang pa Ummat Kafir ha katilingkal Alam amoin magkaba'go ha babaan sin kangan-nganan iban kamazhab-mazhaban iban ha katumpuk-tumpkan dain ha wakto pa wakto.
Hiyukom sin Allah in katan Muslim ha Ummat hambuuk da,farman sin Alla ha Suratul Anbiya ayat 92:
(إِنَّ هَذِهِ أُمَّتُكُمْ أُمَّةً وَاحِدَةً وَأَنَا رَبُّكُمْ فَاعْبُدُونِ)
Tanto tuud in ini Ummat niyo Ummat hambuuk da sarta in ako Tuhan niyo,na! pagta-ipun kamo.
In katan Muslim misan pa biya'diin na in pag Khilaf nila in sila hambuuk Agama ra umatubang pa katan Agama Larak, hambuuk Mazhab da umatubang pa katan Mazhab Larak,hambuuk tumpukan da umatubang pa katan tumpukan Larak.
Simulat kako in hambuuk Student ko ha test paper laong niya:
In Rajih kako-sarta in panghati ha Allah-in maksod sin pagpulakkanat sin Ummat amona in Ummat Ijaba ha tibayhuan sabab:
1.in Rasul SAW siyabbot in duwa tmpukan sin Ummat Da'wa sarta siyabbot niya sin in duwa ini nagpupulakkanat,amona in Yahudi iban Nasrani.
2. bang bukon Ummat Ijaba wayruun kapaiddahan sin Hadith karna in Ummat Da'wa in kariasali nila napupulakkanat na.
3. In jimajato saksi ha pakaradjaan ini,karna in Ummat Ijaba jimato na in pag pulakkanat in iyan dih hikatapok. Iban in Hadith sin Rasul SAW (kulluha finnar illa wahida: in katan makasud Narka malaingkan amura in hambuuk) dih manunjuki pa kumakkal ha daleel sin dugaing hadith.
Nagsarangsukul ako pa hambuuk student sin kiyasulat niya sarta dihilan ko mataas Grade,sumagawa in hikapamong ko: in Ummat Da'wa bukon tub-tub hadja ha Yahudi iban Nasrani,sumagawa samlang in katan Alam lamod na in Mushrik, Mulhid, Majus,Sabi'a katan na sin Aquida ba'tal, mahinang in sabda sin Rasul SAW (wataftariq Ummatiy:mapulakkant in Ummat ko)katiluagan puas sin katupot,pag ubus in Rasul SAW siyabbot in Yahudi iban Nasrani iban pagpulakkanat nila nakauna ampa siyunuan sin kabtangan niya (Ummat ko) daleel sin laos in pagpulakkanat nila sambil pa susungon.
In kapaiddahan sin Hadith dimaragbus sibu da imiyan kita Ummatul-Ijaba atawa Ummat Da'wa, in paidda niya amuna in pagpaanib ha pagpulakkanat iban panghinai kaniya.
Miyunaqasha ako sin hambuuk bagay ko,agi niya:
In dahun in Hadith pa Ummat Da'wa malayo,sabab in Hadith naawn ha kaawnan sin paghina,iban in Kufur katan hambuuk Agama ra,biya'diin kaawn sin walaa' ha mga Ahlul bid'a?
Agi ko:
In Hadith wayruun imiyan (mapulakkanat in Muslim)biya'sin kaiyan(mapulakkanat in Yahudi, iban mapulakkanat in Nasrani).
In yahudi Ummat Ijaba hi Musa Alayhissalam,in Nasrani Ummat Ijaba hi Isa Alaihissalam.
Ha wakto imiyan Ummat sarta wayruun imusal sin Kalima Muslim kiyatabang magpakusug sin in Ummat nasabbot Ummat Da'wa sin Nabi Muhammad SAW.
In Kufur misan pa in kaawnan niya hambuuk Agama ra ha pagtungbas ha adkaw Akhirat,amun tumattap ha api Narka Jahannam,sumagawa in sila mataud jinisan sin Aquida, in Agama sin Wasaniyya dih maitong,in Mazhab sin Ilhadiyya labi dain ha itungan,in Shirik amoin simulang ha Resala sin kanabihan awn kaniya tumpukan iban Jamaa magtataud.
In pakusugon in kawa sin ma'na sin Hadith ha Ummat Da'wa malaggo in bakkas niya iban tumuyo in mga Muslim maglawag iban mangadji iban maglugto umatubang pa Ummat sin Kufur sarta tutuson nila ha Daleel.
In kamaksuran sin Hadith ha paghinae ha pagpulakkanat iban pagapaanib ha pag Ikhtilaf timindug sibu da in imyan kita in Ummat nasabbot Ummat Ijaba atawa Ummat Da'wa,dih makufur in manusiya bang bukon hasabab sin pagkawa nila tabang biya'sin pagkawa tabang sin Buta, iban pag gapi nila ha kaba'talan sarta pangad ha hawa napso.
In walaa' ha mu'min iban Baraa' ha Kafir makawa natu sin kawa matampal bang dahon in Ummat duun ha ini pa Ummat Da'wa,karna in mga Ahlul Bid'a dih natu sila kufurun,dihilan natu sila walaa' ha ganta sin pag-iman nila, nasihatan natu sila iban kawaun ha kahanonot,dahun natu sila mag hiwar sarta panduan natu sila hasupaya kita niyo dih mahinang tabang sin Shayta kanila.
Kalo-kalo hikapuas sin pagkhilaf sarta hika Rajih sin in maksod sin Ummat amona in Ummat Da'wa Hadith sin Rasul SAW -biya'na sin nasabbot ha Sahi Muslim-:
(والذي نفس محمد بيده لا يسمع بي أحد من هذه الأمة يهودي ولا نصراني ثم يموت ولا يؤمن بالذي أرسلت به الا كان من أهل النار)
Sapahan ko ha amoin ginhawa hi Muhammad ha lawman sin lima niya,dih makarungog kako in hangkatau dain ha Ummat ini sibu da Yahudi iban Nasrani ampa mapatay sarta wala nakapamaratsaya ha naparatong kako malaingkan in kaawnan niya ha api Narka jahannam.
Way pagduwa ruwa in Ummat nasabbot duun ha ini amuna in Ummat Da'wa.
***
3. Hatihan sin Firqa Najiya:
In kabatangan sin Rasul SAW (uno-uno na in kaawnan ko iban sin Sahabat ko) pakaradjaan piyagtatayakkupan misan pa wayruun kiyalukis, in pag Iman ha Resala iban ha Rasul amoin mahinang Firqa Najiya amona Ummat Islam, sila in Ahlussunna wal Jamaa ha ma'na ha Shara'.
In katan sin Firaq sin Islam nangngako in sila Ahlussuna Wal jamaa.
Kiyabayta Jalaluddin Dawani sin in hi Nasiruddin in Ferqa Najiya amona in Imamiyya dain ha She'a.
(shikh Muhammad Abdo baynal-mutakallimin wal-falasafa(1/29) tahqiq Dr. Sulaiman Dunya. P.al-halabi)
Tiyugila sin kamatauran sin mga Ulama sin in Ferqa Najiya amuna in Ashaaera.
Agi hi Imam ibno Taymiyya:
Tanto tuud in labi mapatut ha manusiya amuin mahinang Ferqa Najiya: Ahlol Hadith wassunnah amoin wayruun iyagaran nila piyagtaasuban malaingakan amura in Rasul SAW, sila na in saingat-ingat manusiya ha kabtangan niya iban ha kakahinang niya,iban salaggo-laggo ingat magpinig ha antara sin marayaw iban mangih.
(Majmoo' Al-Fatawa (3/347)
Ha adlaw ini piyag agawan sin katan Jamaat Islamiyya ha katan Alam,bang in maksod sin tumpukan lappas hambuuk amona in Agama hambuuk amon Agama Islam in iyan bunnal way pagduwaruwa,Farman sin Allah:
(وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ وَهُوَ فِي الْآخِرَةِ مِنَ الْخَاسِرِينَ)
Hisiyo-siyo in magmuhot ha dugaing dain ha Islam pag-agamahan,na! tanto dih taymaon kaniya,iban in siya ha Adlaw Akhirat dain ha mga Lugi.
( Sura Al-Imran ayat 85)
Bang in maksod Ferqa Najiya ha lawman sin Agama Islam,wajib kawaon in katan sin Ra'yo niya,na in iyan babandingon marayaw sabab wayruun na ma'som mapuas sin kanabihan, in tiyap-tiyap manusiya kakawaon in bissara niya iban hibubugit malaingkan amura in tagdapo Rawda Assharifa.
In timbangan mattan amona in hibalik in katan mas-ala hambuuk-hambuuk pa kitab sin Allah iban sunnat sin Rasul niya.
Dain ha sabab yan hi Imam Ibno taymiyya mapino rakuman ha kapamong niya:
"In subay ra isab ingaton, in mga tumpukan amoin timutundan ha tiyutundanan nila ha Usuluddin iban ha Kalam mataud in darajat niya,awn dain kanila nakasulang tuud ha Sunnat ha Usul salaggu-laggu,awn da isab dain kanila hat hadja sila nakasulang ha sunnat ha pakaradjaan asibi,hisi-siyo in nakasulak ha dugaing dain kaniya dain ha mga tumpukan amoin maslabi malayo dain ha sunnat dain kaniya,nakahinang siya marayaw ha pagsulak niya ha mangih iban kapamong niya ha marayaw.
Sumagawa mahinang siya nakaliyo dain ha kaadilan ha pagsulak niya,hasabab sin siyulang niya in kaibanan kasabunnalan iban nakapamong siya sin kaibanan kaba'talan, na mahinang kiyasulak niya in bid'a salaggo-laggo sin bid'a magaan dain kaniya. Iban kiyasulak niya in ba'tal sin ba'tal magaan dain kaniya, ini in kahalan sin kamatauran sin Ahlul Kalam amoin timutundan ha Ahlussunnah wal-jamaa.
In biya' kanila ini pagka wala nila hinang in bid'a nila dain naman ha bissara iban kakahinang hikabutas ha Jamaa sin mga Muslimin dain ha kalawngan in bantahun sila,karna in Allaho Taala pag-ampunon ha mga mu'min in kalawngan nila ha biya sin nasabbot yadto.
Dain hasabab yan jimato in hantang bihaini ha kamatauran dain ha Salaf sin Ummat iban ha kaimaman niya,awn dain ha mga kabtangan kiyabissara nila ha Ijtihad nila sadja sin sulang ha nasabot ha kitab iban sunnah".(Majmoo' Al-Fatawa (3/348)
***
4-Maksud ha kabtangan (katan sila ha Narka):
In kabtangan sin Rasul SAW (katan sila ha Narka malaingkan amura in hambuuk) bukon in ma'na nakufur na in katan sin nakapin tumpukan bang dahun in Ummat ha Ummat Ijaba,ampa in pagsud sin Mu'min pa Narka dih kumakkal.
Manjari mapatot in hambuuk mu'min makasud Narka sumagawa maapon siya sin Allah, ampa in kaampuanan sin Allah ha mapuas dain ha Shirik ha lawman sin pagbaya niya,ha Farman niya ha sura Nisa ayat 116:
(إِنَّ اللَّهَ لَا يَغْفِرُ أَنْ يُشْرَكَ بِهِ وَيَغْفِرُ مَا دُونَ ذَلِكَ لِمَنْ يَشَاءُ وَمَنْ يُشْرِكْ بِاللَّهِ فَقَدْ ضَلَّ ضَلَالًا بَعِيدًا)
Tanto tuud dih ampunon sin Allah in magshirik kaniya sarta ampunon niya in mapuas dain hadto ha hisyo-siyo na in kabayaan niya,iban hisiyo-siyo in magshirik pa Allah na tanto tuud nalawng na siya sin lawng salayo-layo.
In katan sin Feraq sin Islam naglalamod ha Usulan sin Agama iban naghahambuuk in Aquida nila ha pag-iman.
Bang ta dahun in Ummat nasabbot duun ha ini pa Ummat Da'wa mahinang in katan tumpukan makapin kaniya ha api Narka Jahannam Kakkal,malaingkan amura in mga Muslim karna sila ra in Tumpukan Salamat,iban tagdapo sin Agama Mattan.
Farman sin Allah ha Sura Imran ayat 85:
(وَمَنْ يَبْتَغِ غَيْرَ الْإِسْلَامِ دِينًا فَلَنْ يُقْبَلَ مِنْهُ وَهُوَ فِي الْآخِرَةِ مِنَ الْخَاسِرِينَ)
Hisiyo-siyo in magmuhot ha dugaing dain ha Islam pag-agamahan,na! tanto dih taymaon kaniya,iban in siya ha Adlaw Akhirat dain ha mga Lugi.
***
5- Riwayat iban pikilan:
Nakasabbot hi Doctor Abdulhalim Mahmod ha kitab Tafkir al-falasafi fel-Islam(1/100) pikilan sarayaw-rayaw,agi niya:
Sumagawa dain ha mga mangdahi pa kasanyang sin pangatayan sin hi Sha'rani ha kitab niya Mizan nakariwayat dain ha Hadith hi Ibno Najjar,sarta miyattan siya hi Hakim ha lapal Garib,amona in:
(ستفترق أمتي على نيف وسبعين فرقة كلها في الجنة الا واحدة)
Mapulakkanat in Ummat ko pa labi kapituan tumpukan,katan sila ha Surga malaingkan amura in hambuuk.
Ha riwayat dain kan Daylami:
(الهالك منها واحدة)
In mabinsana dain haniya hambuuk.
Ha Hamish Almizan dain kan Anas dain ha Nabi SAW ha lapal:
(تفترق أمتي على بضع وسبعين فرقة كلها في الجنة الا الزنادقة)
Mapulakkanat in Ummat ko pa labi kapituan tumpukan,katan sila ha lawm surga malaingkan amura in Zanadiqa.
In ha Hamish Al-mizan ini nasabbot hi Ibni Hajar ha pagpaguwa sin kahadith-hadisan ha Musnad Ferdaws ha lapal:
(تفترق أمتي على بضع وسبعين فرقة كلها في الجنة الا واحدة وهي الزنادقة) أسنده عن أنس.
Mapulakkanat in Ummat ko pa labi kapituan tumpukan katan sila ha lawm surga malaingkan amura in hambuuk amuna in Zanadiqa.
Isnad niya dain kan Anas.
In agi sin tagdapo sin kitab Kashful Khafa': "kalo-kalo in dagbos sin pagpahambuuk sin mga Hadith ini,in maksod sin Tau Surga ha Riwayat hikaruwa misan malugaypa…na dung-dungi"
Ha kahinapusan sabbuton natuh in pikilan hi Ibno Hazam ha kitab Alfasl felmilal wal-ahwa wannihal(3/247),agi niya:
Simabbot sila hadith dain ha Rasul SAW sin in Qadariyya iban Murjea majoos sin Ummat ini,iban hadith dugaing:
(تفترق أمتي على بضع وسبعين فرقة كلها في النار حاشا واحدة فهي في الجنة)
Mapulakkanat in Ummat ko pa labi kapituan tumpukan katan sila ha lawm Narka malaingkan amura in hambuuk,in siya ha lawm surga.
Agi hi Abu Muhammad:in duwa hadith ini dih manjari in kariasali sin Isnad niya,iban uno-uno na in kaawnan niya bukon siya Hujja ha mga sila magpamong ha khabar wahid,biya'diin na ha mga sila dih magpamong kaniya?!!.
.gif)
.gif)
1 Responses So Far:
أسأل الله أن ينفعكم هذه المدونة